PAPEREKOA

Iritzia: Bizi

Hona hemen Intza Unanuek KARKARAren 411. zenbakirako idatzitako iritzi artikulua, "Nire honetan" atalean.

Denbora aurrera doa. Geroz eta azkarrago, eskuetatik alde egin nahiko baligu bezala, joaten utziko bagenio bezala.

Jaio eta kontziente garenetik zeruaren mailan jartzen ditugu bizitzan zehar lortu beharreko helburuak. Handiegiak izaten dira, akaso. Aldi berean, bidean eskuratzen ditugun lorpen txiki horiei erreparatzea ahazten zaigu.

Leku zaharretara itzultzen gara, izan zen hura oroituz eta aurrean orain duguna begi bistan, zirriborrotsu bilakatuz. Galdutakoari begiratzen diogu, goibel, irabazitakoari heldu
 beharrean. Eta “zoriontasuna” eskatzen dugu, baina guk berari irribarre egiten ez badiogu, berak ez digu bueltan ezer emango.

Norbanakoaren askatasunak duen balioaz oroitu beharko genuke halakoetan: gertukoekin elkarbanatzen dugun maitasunaz, laguntasunaz edo lagunduak izan eta laguntza emateaz. Kantu bakar batekin mundu paralelo batera iristeaz. Ostiraletan jan-edanaren bueltan bildu eta norbere bizipenak kontatzeko eta besteenaz gozatzeko tartea izateaz. Herriko kaleetatik joan eta ezagunen agur irribarretsu bat jasotzeaz.

Besterik gabe bizitzeaz arduratu beharko genuke. Eta denbora, joan dadila aurrera, baina gure eskutik.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!