Orioko Udalak eta Aldundiak parte-hartze prozesua abiatuko dute haurren kale-jolas autonomoa eta aktiboa sustatzeko

Hiru bilera egingo dituzte, eta aurrenekoa urtarrilaren 21ean izango da, 18:00etatik 20:00etara, Kultur Etxeko areto nagusian.

Orioko Udalak eta Gipuzkoako Foru Aldundiak haurren kale-jolas autonomoa eta aktiboa sustatzeko parte-hartze prozesua abiatuko dute urtarrilaren 21ean, asteartean.  Parte-hartze prozesuaren barruan hiru bilera egingo dira urtarrilean eta otsailean. Lehenbizikoa datorren asteartean izango da, urtarrilaren 21ean, eta gaiarekin interesa duten eragile eta herritar orok du gerturatzeko aukera. Bilera Kultur Etxeko areto nagusian izango da, 18:00etatik 20:00etara.

Kale-jolas autonomoa eta aktiboa sustatzeko

Parte-hartze prozesua, batez ere, 0-10 urte bitarteko haurren gurasoei eta haurrekin lanean dabiltzan profesionalei zuzenduta dago (entrenatzaileak, begiraleak, hezitzaileak…). Helburu orokorra hau da: Orion 0-10 urte bitarteko haurren artean bat-bateko kale-jolas autonomoa eta aktiboa sustatzea. Horretarako, honako galderak planteatuko dira:

  • Nolakoak izan behar lukete gure haurren jolasek? Eta Orion, non eta nola egiten dute jolas?
  • Neskek eta mutilek berdin egiten dute jolas Orion?
  • Orioko familien bizi-baldintzek nola eragiten dute beren txikien aisialdia?
  • Zein dira oztopoak eta baliabideak Orion, eta non daude?
  • Zer aldatu beharko litzateke? Zer eskatzen dugu, eta nori? Eta zer egin dezakegu guk?

Jolas librearen garrantzia

Jolasak berebiziko garrantzia du haurraren garapenean, baliabideak eskaintzen baitizkie garapen motorrerako, intelektualerako, emozionalerako eta sozialerako.

Gaur egun, ordea, gure haurrek gero eta denbora gehiago pasatzen dute helduen gidaritzapean eta gero eta aukera gutxiago dituzte beren jolasak modu autonomoan kudeatzeko. Joko antolatuak eta kirolak hartu du bat-bateko jolasaren lekua eta, horrekin batera, herriko naturguneek eta kaleek lekua galdu dute kirol-kantxa eta jolas-parke seguruen aurrean.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!