Orioko Udaletik jakinarazi dutenez, herritar gehienak zuzen eta zintzo ari dira betetzen konfinamendu-garai honetan administrazioak ezarritako arauak, baina, nabarmendu du tarteka badirela salbuespenak. Urola Kostako Udal Elkarteak traste zaharrak biltzeko zerbitzua eten egin zuen konfinamendua indarrean jarri zenean eta hala adierazi zien herritarrei. Zerbitzu hori etenda dago geroztik, bestelako abisurik eman arte. Hala ere, herritar batzuek etxeko traste zaharrak eta altzariak kalera ateratzen segitzen dute. Hori dela eta, udalak oharra argitaratu du gogorarazteko debekatuta dagoela trasteak ateratzea bilketa-zerbitzua etenda dagoen bitartean.
Zerbitzua berriro abian jartzen denean, Udalak jakinaraziko du ohiko bideak erabiliz.