Gaur iluntzean, moila inguruan giza katea osatzeko deia zabaldu du herritar talde batek, Erraustegiak ere hil egiten du lelopean. Antolatzaileek azaldu dute, erraustegia oraindik ireki ez badute ere, maiatzaren 9an erraustegitik Oria ibaira doan errekako harkaitzetan "ehundaka arrain hilda" agertu zirela. "Asko dira erraustegi batek ingurumenean eta pertsonen osasunean eragiten dituen kalte larriak frogatzen dituzten ikerketak", azaldu dute. Horregatik, herritarren osasunaren alde mobilizatzera deitu dituzte oriotarrak.
Alde batetik, gaur iluntzean elastiko zuria jantzita kirola egitera ateratzeko eskatu diete herritarrei. "20:45ean elkartuko gara moila eta zubi inguruan atseden hartuz, protesta egiteko. Sirena hotsak markatuko du giza katearen hasiera eta bukaera, bost minutukoa izango da. Bigarren sirena hotsaren ondoren, bakoitzak bere bidetik jarraitu beharko du", azaldu dute antolatzaileek. Bestalde, konfinamenduko arauak betetzea "ezinbestekoa" izango dela nabarmendu dute, parte hartzaileen arteko bi metroko tartea errespetatzea alegia.