Bi hilabete eta erdi itxita egon ondoren, gaur ireki ditu ateak berriz Orioko Udal Kanpinak. COVID-19ak sortutako larrialdi egoerari erantzuteko, hainbat protokolo eta babes neurri hartu dituzte, besteak beste, bungalowetan egin ohi duten bezala, bezeroek partzelen erreserbak ere aldez aurretik egitea lortu nahi dute. "Hoteletan eta bestelako ostatuetan egiten den bezala, erreserba egiten dutenean zehaztu beharko dute erabiltzaileek zenbat egun pasako dituzte kanpinean. Neurri horrekin uda sasoian kanpinaren sarreran sortzen diren ilarak ekidin nahi ditugu, eta okupazioa kontrolatu". Izan ere, gaur egun kanpinak duen pertsonala eta komun kopurua kontuan hartuta, %50ean mugatu dute aforoa.
Gaur bertan, ireki berritan, jaso dute partzelen eremuko lehen erreserba, eta denboraldi osoa kanpinean pasatzen duten egoiliar batzuk ere iritsi dira kanpinera.