Eusko Label Ligaren eta Euskotren Ligaren aurkezpen ekitaldia egin dute goizean Donostiako Aquariumeko auditorioan, eta bertan elkartu dira klub parte hartzaile guztiak. Iazko ligen garaileei garaikurren erreplikak eman dizkiete lehenik eta behin:
Orioko gizonezkoen entrenatzaile Jon Salsamendik CaixaBank Koroaren erreplika jaso du Donostialdeko Caixabanken Negozio Arloko zuzendari Itziar Egañaren eskutik, eta Orioko emakumezkoen patroi Nadeth Agirrek Euskotren Trofeoarena, Arantxa Tapia Eusko Jaurlaritzako Ekonomiaren Garapen eta Azpiegitura sailburuaren eskutik. Orioko bi ordezkariek liderraren maillot berriak ere jaso dituzte.
Eusko Label Liga uztailaren 4an hasiko da A Coruñan, 18:00etan, eta gizonezkoen lehen jardunaldirako txanden zozketak ere egin dituzte: CR Ares, Donostiarra, Ondarroa eta Orio lehen txandan egingo dute arraunean; Lekittarra, Santurtzi , Cabo eta Zarautz bigarren txandan; eta Hondarribia, Kaiku, Urdaibai eta Zierbena hirugarren eta azken txandan.