Azken egunetan ez da beste konturik batean eta bestean. Berriro hazten ari da COVID-19 birusarekin kutsatutako pertsona kopurua, eta Orio ez da salbuespena. Merkatari eta ostalariak kezkatuta daude, ahalik segurtasun neurri gehien hartzen dabiltza, berriz pertsianarik jaitsi behar ez izateko, nahiz eta jaisten duten batzuk prebentzioz egin.
"Beldurrez ari gara lanean", kontatu du goizean kafetegi batean herriko taberna bateko jabeak. Dendari bat, berriz, galdezka dabil, ea zer nobedade dauden herrian, horren arabera neurri gehiago hartzeko. "Sartzen zaizu familia bat, eta denak batera gauzak probatzen, ez dakizu zeinek zer egin duen eta kontrolatzea ez da batere erraza", kexatu da. "Ez dugu berriz itxi nahi, hori azkena da".
Herriko bi jatetxe kudeatzen ditu Unai Holgadok, eta hark azaldu du bi lokaletako langile guztiak banatzeko erabakia hartu dutela, bi jatetxeei batera ez eragiteko koronabirusaren berragerraldirik balego. "Zerbitzariak eta sukaldeko langileak ez ditugu nahastuko jatetxe batean eta bestean, eta administrazio lanak ere aparte egingo ditugu bada ez bada", azaldu du. Lehendik ere neurri zorrotz batzuekin ari ziren lanean Orioko Barra eta Balea jatetxeetan, eta Holgadok kontatu du ezinbestekoa zaiela 37 pertsonako lantaldea babestea, "itxiz gero, 37 pertsona doazelako langabeziara edo aldi baterako lan erregulazio egoerara".