Oriok eta Santurtzik eutsi nahi izan diote Zierbenak jarritako hasiera biziari; Pedreña, aldiz, berehala geratu da atzean. Luzeak egiten joan ahala, Oriok lauzpabost segundoko aldearekin eutsi dio talde bizkaitarrari, lan benetan txukuna eginez; Santurtzi, bien bitartean, segundoak galtzen joan da pixkanaka-pixkanaka. Egindako ahalegin guztiak ez dira nahikoak izan aldeak murrizteko, eta, azkenean, Zierbenak sekulako erakustaldia eginda, Espainiako txapeldun izan da. Oriok zilarra bereganatu du, eta brontzea Santurtzirentzat izan da.
Oriok estropada oso serioa jokatu du, laugarren kaletik, baina Orio Arraunketa Elkarteko presidente Iosu Esnaola ez da gustura agertu ETBri eginiko adierazpenetan, inguruko ontziak gainera sartu zaizkielako beraien lana eragozten eta hirugarren luzean Zierbena beraien kalera sartu delako. Gorka Aranberri patroia zapore gazi-gozoarekin geratu da, izan ere, estropada ona egin dutela dio, baina bigarren bukatzea tokatu zaiela nabarmendu du.
SAILKAPENA
1. Zierbena 19:45,74
2. Orio 19:50,45
3. Santurtzi 20:16,93
4. Pedreña 20:36,70