Futbol zelaitik erretiratutako belar artifiziala doan banatuko du udalak

Irailaren 16an, asteazkenarekin, itxiko da eskaerak egiteko epea.

 

Orioko elkarteek eta edozein oriotarrek izango du aukera eskaera egiteko, hemen klik eginez zabalduko den formularioa beteta. Bertan adierazi behar da nork egiten duen eskaera, kontaktatzeko telefono eta e-mail bat, eta bakoitzak zenbat metro belar behar dituen.

Behin eskaera eginda, norberak joan beharko du belarra jasotzera futbol-zelaira, ostegun edo ostiral honetan, ordutegi honen barruan:

  • Ostegunean: 08:00 - 11:00
  • Ostiralean: 11:00 - 14:30

Udal-brigadako langileak bertan egongo dira laguntzeko, baina materialaren garraioa norberaren kontu izango da.

Belar berria jarriko du Udalak

Udalak belar artifizial berria jarriko du Mendibeltz futbol- eta softbol-zelaian eta, horretarako, zaharra kendu du dagoeneko. Belar artifizial zaharra botatzeko partez, Udalak erabaki du doan eskaintzea erabili nahi duten herritarrei, zenbait erabileratarako egokia izan daiteke-eta. 1,85 metro zabaleko biribilkitan dago belarra eta eskaeragile bakoitzak nahi adina metro eskatu ditzake. Ondoren, eskaera guztiak jaso eta gero, Udalak erabakiko du banaketa nola egin: eskaera guztiak asetzeko adina material baldin badago, eskatutakoa emango zaie guztiei; bestela, moldatu egin beharko da.

Belar artifizialaren eskaera egiteko momentuan, eskarigileak konpromisoa hartu behar du materialaren erabilera egokia egiteko eta, erabili ondoren, behar bezala birziklatzeko.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!