Zenbait atzerapenen ostean, gaur ekin diete Orioko plaza inguruan zoru berria jartzeko lanei. Aritzaga-Endaia-plaza inguruan egingo dute obra, eta udalaren arabera, Altuna y Uria enpresak aurreikusi du "bi hilabete pasatxo" beharko direla lan guztia amaitzeko.
Plazako obrak "nahi baino gehiago luzatu" direla dio udalak, "batez ere, zoladura jartzea". Izan ere, aldaketak izan dira proiektuan. "Proiektuan aurreikusitako zoladura basaltozkoa zen eta berandu iritsi zen, COVID-19ak sortutako hornidura-arazoengatik. Basaltozko zoladura hura jartzen hasi zirenean, udala konturatu zen ez zela hasieran enkargatutako material bera eta, gainera, akastuna zela eta mikrofisurak zituela", azaldu du udalak. Hortaz, zoru hura "atzera botatzeko" erabakia hartu zuen.
Granitozko zoladura mota berri bat jo zuten egokitzat uztailean, eta aurreko astean iritsi zen materiala Oriora. Langileak hasi dira jada lur berria jartzen, eta esan bezala, abendurako lanak amaituta egon daitezkeela adierazi dute. Aurrerantzean, obra inguruan hesiak eta itxiturak jarriko dituztela ere ohartarazi du udalak.