Euskaraldia 2020

"Norbaitek nire hizkuntza zein den galdetzen didanean, euskara dela erantzuten diot"

Azaroaren 20tik abenduaren 4ra egingo da aurten, bigarrenez, Euskaraldia, eta hainbat berrikuntza izango ditu. Izan ere, aurten, norbanako bezala (ahobizi edo belarriprest izanez) parte hartzeko aukeraz gain, taldean egiteko aukera ere egongo da arigune-en bidez.

Orion, esaterako, hainbat merkatari, ostalari eta eragilek osatu dute Euskaraldia babesten eta sostengatzen duen hamalaukoa. Errusta taberna da Euskaraldian parte hartuko duen establezimenduetako bat. Arantxa Ibar Atxega arduradunaren testigantza da hau:

"Ni Sevillan [Andaluzia, Espainia] jaio nintzen, eta duela hamar urte iritsi nintzen Euskal Herrira. Euskara ikasteko ahalegina egin dut, eta gaur egun norbaitek nire hizkuntza zein den galdetzen didanean, euskara dela erantzuten diot. Hala, garrantzitsua iruditzen zait euskararen erabilera sustatzeko ekimenak sortzea, eta, horregatik, erabaki nuen Euskaraldian parte hartzea. Izan ere, ostalaritza arloan euskaraz hitz egitea garrantzitsua dela iruditzen zait. Hasieran, Donostian bizi nintzen eta Oriora lanera etorri nintzenean euskaraz ez nekienez, kosta egiten zitzaidan tabernara etortzen ziren adinekoekin komunikatzea. Hitz gutxi batzuk ikasi nituen, eta lau hilabete pasa nituen bezero batekin egunero elkarrizketa bera izaten. Orduan ohartu nintzen euskara jakitea oso garrantzitsua zela, eta pixkanaka ikasten joan naiz. Lagunek eta bikoteak asko lagundu didate ahalegin horretan".

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 36 euro besterik ez dira!


Izan zaitez KARKARAko laguntzaile!