Duela 120 urte harrapatu zuten oriotarrek balea, eta 2001ean ehungarren urteurrena ospatu zenetik, bost urtetik behin antolatu izan du Orioko Udalak Balearen Eguneko festa handia. Aurten tokatzen bazen ere, izurrite egoera dela eta ezinezkoa izan da festa egitea, baina herriko eragileek ospatu dute Balearen Eguna, bakoitzak bere erara.
Orioko Herri Ikastolako Lehen Hezkuntzako ikasle batzuk, esaterako, gaur eguerdian Balearen Plazan elkartu dira, eta Balearen Bertsoak abestu dituzte, taldetxo batek agurra dantzatzen zuen bitartean. Inguruko bizilagunak leiho eta balkoietara irten dira Balearen Bertsoak entzun dituztenean, eta asko hunkitu ere egin dira. Gora oriotarrak esan beldur gabe ozen abestuz eman diote haurrek bukaera saiotxoari.