Asteburuko jardunaldian Kanariar Uharteetan izan zuen hitzordua Orioko Bate Bizkorrak taldeak, Capitalinos taldearen aurka. Bi partida jokatu zituzten eta oriotarrek garaipen bat lortu zuten.
Lehenen partidan etxeko taldea aurretik jarri zen markagailuan, lasterketa bateko aldearekin lehenengo sarreran. Dena dela, OBBk azkar erreakzionatu zuten eta hiru lasterketa osatzea lortu zuten, markagailuan aurrera eginez. Lehia estua izan zen, kanariarrek amore eman ez zutelako, eta azkenean etxeko taldearentzat izan zen garaipena.
Bigarren partida, berriz, oso itxia izan zela nabarmendu dute OBBko kideek, 5. sarrera arte 0-0 berdinketa izan zelako. Kanariarrak izan ziren markagailua estreinatzen lehenak, baina oriotarrek azkar erantzun zuten era bi lasterketarekin aurretik jarri ziren. Lehia estua izan zen bigarren jardunaldian ere, baina OBBrentzat izan zen garaipena, 4-2 emaitzarekin. "Azken unera arte gogor eutsi genion partidari. Igone Etxeberria jaurtitzaileak, esaterako, lan paregabea egin zuen defentsan eta baita erasoan ere. Bi hit bateatu zituen 3 lasterketa lortuz. Momentu honetan taldeko bateatzailerik onena dela esango genezake", adierazi dute OBBko kideek. Bestetik, Maialen Pison katxerrak egindako lana ere azpimarratu dute taldekideek, 4 jokalari kaleratu baitzituen.
Hurrengo jardunaldia Orion jokatuko du OBBk Miralbueno Zaragozako taldearen aurka.