Orion eta Aian ez da koronabirus kasurik izan

65, 24ko intzidentzia tasa du Oriok gaur gaurkoz, eta Aiak 100,76koa. Eskualdean hamar positibo izan dira guztira.

Eusko Jaurlaritzako Osasun Sailak duela minutu gutxi kaleratu ditu koronabirusaren bilakaera zehazten duen txostena, eta haren arabera, Aian eta Orion ez da positiborik izan azken orduetan. 100,76 eta 65,24ko intzidentzia tasak dituzte bi herriek, gaur gaurkoz. Oriok gutxi falta du eremu berdean sartzeko.

Eskualdean hamar positibo zenbatu dituzte denera. Azpeitian zenbatu zituzten atzo kasu gehien; han, lau positibo hauteman zituen Osasun Sailak, eta intzidentzia tasak gora egin du berriz ere; 262,81eko zenbatekoa dute egun han.

Zarautzen eta Zestoan, berriz, bina positibo atzeman dituzte. Zarautzen behera egin du intzidentzia tasak, 149,91n kokatuz. Zestoan, ordea, gora egin du zenbatekoak, eta 359,53an dago egun. Azkoitian eta Zumaian, ostera, positibo bana atzeman dute; Azkoitian intzidentzia tasak gora egin du zerbait, 200,28an kokatuz. Zumaiako tasa, berriz, 234,05ekoa da, atzo baino baxuagoa.

Gainerako herrietan ez dute positiborik zenbatu. Errezil izan ezik –805,15–, beste herri guztiak eremu horiaren eta laranjaren artean daude, hala nola Aizarnazabal –390,12–, Beizama –hutsean– eta Getaria –353,36–.

Positibo eta ospitaleratze gutxiago

Hego Euskal Herrian atzo, asteazkena, herenegun baino positibo gutxiago zenbatu zituzten. Osasun Sailak eta Osasunbideak emandako datuen arabera, atzo 498 positibo atzeman zituzten. 50 kasu zenbatu zituzten Araban, 199 Bizkaian, 136 Gipuzkoan eta 101 Nafarroan; lurralde horietatik kanpo bizi diren herritarren artean, bestalde, hamabi positibo detektatu zituzten. Araban, Bizkaian eta Gipuzkoan 5.930 proba egin zituzten guztira, eta positibotasun tasa %6,7an kokatu zen. Nafarroan, ostera, 1.372 proba egin zituzten eta positibotasun tasa %7,2koa izan zen.

Araban, Bizkai eta Gipuzkoako intzidentzia tasak behera egin du, eta hiru lurralde horietako batez bestekoa 298,95ekoa da. Eremu laranjatik horira pasatu dira, beraz, hiru lurralde horiek. Bestalde, herenegun baino gaixo gutxiago artatu zituzten Osakidetzaren mendeko erietxeetan. Hain zuzen ere, 38 ospitaleratze izan ziren hiru lurralde horietan; guztira, 198 lagun zeuden atzo ospitaleratuta –212 ziren herenegun–. ZIUn, berriz, 73 pertsona zeuden, herenegun baino bi gehiago. Nafarroan, aldiz, bost lagun ospitaleratu zituzten atzo; guztira, 76 pertsona zeuden Nafarroako erietxeetan –herenegun baino lau gutxiago–, eta 25 ZIUn –herenegun bezala–.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!