Orioko Ludotekak ikasturte berriari ekin dio. Atzo ireki zituen ateak ,eta dagoeneko irekita dago bertan izena emateko epea. Txurrumuski elkarteak kudeatuta, HH5 eta LH3 bitarteko haurrei ematen zaie zerbitzua ludotekan astelehenetik ostiralera, 16:45etik 19:30era. Bertan aisialdi dibertigarri, dinamizatu eta euskalduna eskaintzen die Orioko neska-mutikoei, segurtasun-neurri guztiak hartuta.
Iraila bukaera bitartean dago irekita aurtengo ikasturteko matrikulazioa, eta interesa dutenek ludotekara bertara zuzendu behar dute, aipatu ordutegian. Guztira, lau talde osatuko dituzte: bi, astearte eta ostegunetan joango direnak; eta beste bi, asteazken eta ostiraletakoak. Astelehenak txandaka egingo dituzte talde batzuek eta besteek. Horrez gain, Gabonetan eta Aste Santuko oporretan goizez irekiko dituzte ateak, familiei ahalik eta zerbitzurik onena emateko asmoz.
Informazio zabalagoa jaso edo edozein zalantza argitu nahi duenak 943-13 30 05 telefono zenbakira dei dezake edo ludoteka.orio@txurrumuski.org posta elektronikora idatzi.