Olidenen idiek parte hartuko dute Errezilgo Kintopeko XXII. Sarian

Dorleta Agiriano Lai 2021ko ira. 17a, 11:00
IƱaki Oliden, Aizarnazabalen.

Gaur hasiko dira sariketako idi demak Errezilen, eta bederatzi idi pare lehiatuko dira. Asteleheneko jardunaldian izango dira Olidenen idiak.

Errezilen iaz zen jokatzekoa Kintopeko XXII. Idi Dema Saria, baina pandemia zela-eta, bertan behera geratu zen. Aurten, ordea, hogeita bigarren edizioari heltzea erabaki du Gaztetandik kultur elkarteak: hiru jardunaldi izango dira Errezilgo probalekuan; hain justu, gaur, bihar eta astelehenean. 21:00etan hasiko dira saio guztiak.

Bederatzi idi parek hartuko dute parte aurtengo lehian, tartean, Orioko Iñaki Olidenen idiek. Asteleheneko jardunaldian izango da Oliden, Lopategirekin (Billela) eta Bixkiekin (Errezil) batera.

Gaurkoan, sariketari hasiera emateko, Intxaurburu (Hernani), Olatzar Eraikuntzak (Lezo) eta Mendipe (Billela) lehiatuko dira. Biharko idi deman, berriz, Basoarte (Billela), La Cruz (Gatika) eta Akuleti (Bermeo) arituko dira.

Saizar txapelketarako puntuagarria izango da Kintopeko XXII. Saria, eta bederatzi lehiakideek jasoko dute sariren bat. Aurreneko postua lortzen duenak mantak, garaikurra eta 1.300 euroko saria jasoko ditu.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!