Datozen hamar urteetarako Euskara Plana egin nahi du Orioko Udalak, eta gogoeta prozesu bat abiatu du plan horren edukia herritarrekin batera lantzeko. Lanketa modu ordenatuan egiteko, estrategikotzat jotzen dituen lau alorretan lantalde bana osatu du: kirola, hezkuntza, merkataritza eta sentsibilizazioa. Horiekin bilera erronda hasi zuen joan den astean, eta kirol esparruko eragileetako ordezkariekin lehen bilera eginda, hezkuntza esparruko eragileen txanda da orain. Datorren asteartean bilduko da horiekin Salatxo aretoan, 18:30ean. Udalak zuzenean gonbidatu ditu hezkuntza arloko herriko eragileak, baina besteren batek bilerara azaldu nahi badu, zabalik izango ditu ateak, bilera irekia izango baita.
Asteartekoa hezkuntza arloko lantaldearen lehendabiziko bilera izango da, eta urtarrilera bitartean lantalde bakoitzarekin gutxienez hiru aldiz biltzea aurreikusten du udalak. Lehendabiziko saioan, ahulguneetan eta indarguneetan jarriko dute arreta, egoeraren diagnostiko ahalik eta zehatzena egiteko. Bigarren saioan, lehen saioan bildutako informazioarekin egindako diagnostikoaren berri emango dute, datozen hamar urteetarako helburuak finkatuko dituzte, eta baita horiek lortzeko ekintzak proposatu ere. Azkenik, hirugarren saioan, lantaldeak egindako lanaren emaitza aurkeztuko dute, fintzeko eta osatzeko.