Datozen hamar urteetarako Euskara Plana egin nahi du Orioko Udalak, eta gogoeta prozesu bat abiatu du plan horren edukia herritarrekin batera lantzeko. Horretarako, lau lantalde osatu ditu, eta gaur herriko dendari, tabernari eta ostatu jabeen txanda izango da, Salatxo aretoan, 14:30ean.
Gaurkoa merkataritza lantaldearen lehen bilera izango da, eta urtarrilera bitartean lantalde bakoitzarekin gutxienez hiru aldiz elkartzea aurreikusten du udalak. Udalak zuzenean gonbidatu ditu ostalariak eta merkatariak, baina bilera irekiak izango dira, eta gaiarekin interesa duen edozeinek parte hartu dezake.
- Lehen saioan, ahulguneetan eta indarguneetan jarriko dute arreta, egoeraren diagnostiko ahalik eta zehatzena egiteko.
- Bigarren saioan, lehen saioan bildutako informazioarekin egindako diagnostikoaren berri emango dute, datozen hamar urteetarako helburuak finkatuko dituzte, eta baita horiek lortzeko ekintzak proposatu ere.
- Azkenik, hirugarren saioan, lantaldeak egindako lanaren emaitza aurkeztuko dute, fintzeko eta osatzeko.