Azaroaren 25a

Emakumeen aurkako indarkeriaren kontrako aldarria ozen entzun da herriko kaleetan

Herritar ugarik egin du bat Xaltxerak talde feministak egindako deialdiarekin, eta 19:00etan plazatik abiatu dute manifestazio zaratatsua 'Bizitzak orain!' lelopean, herrian barrena.

Gaur, Emakumeen Kontrako Indarkeriaren Aurkako Egunean, manifestazio zaratatsua egin da herrian, Orioko Xaltxerek deituta. 19:00etan zegoen zita jarrita plazan, eta handik abiatu dira herritarrak, Eusko Gudari kalean barrena. Zenbaitek zalaparta ateratzeko tresnak ibili dituzte eskuetan, eta oihu egindako aldarriak ere ozen entzun ahal izan dira, egin duten buelta guztian zehar. Arrantzale kalera buelta hartuta, plazara itzuli dira segidan, eta han borobilean jarri dira.

Kale agerraldiari amaiera eman aurretik, Euskal Herriko Mugimendu Feministak ateratako manifestua irakurri dute, eta ondoren, gaur beste herri askotan ere entzun den Zutik, emakumeak! abestia kantatu dute, denek batera. Hau da abestiaren letra:

Zutik emakumeak
hautsi gure kateak
zutik, zutik, zutik!

Lehengorik gabe, emazte
gure historiarik gabe.
Mende lehenetik, emazte
lur ixildua gara.

Zutik emakumeak...

Esklabo zapaldua, emazte
saldu, biolatuak.
Etxe guztietan, emazte
mundutik baztertuak.

Zutik emakumeak...

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!