Iaz pandemiaren ondorioz bertan behera laga ondoren, 'Jostailu erabilien truke-azoka' antolatu du Herrio Natur Taldeak aurten. "Azokak dituen balioak eta sortzen duen interesa" ikusita, ekimena berriro martxan jartzea erabaki dute.
Hala, lehengo hilaren 26an, Zaraguetan eta Ikastolan bildu zituzten erabilitako jostailuak, eta azaldu dutenez, badituzte trukatzeko "mordoska bat" jostailu dagoeneko. Ostiral honetan, berriro egingo dute bilketa, eta oraingoan, Salatxo aretoan izango da 17:00etatik 19:00etara.
Hurrengo egunean, larunbatean, truke-azoka ospatuko dute, toki berean. Natur taldeak azaldu duenez, "ordutegi okerra azaltzen duten kartelak" azaldu dira herrian, eta ordutegi zuzenak zein izango diren zehaztu nahi izan dute: larunbatean, azoka 10:30ean hasi eta 14:00etan bukatuko da.
Izurritearen egoerari erreferentzia eginez, Herriok eskaera egin die parte hartzaileei, osasun neurriak bete ditzaten: "Musukoa jantzita izatea beharrezkoa izango da areto barruan, eta gelako aireztapena bermatua egongo da".