Mutiozabal ontziolaren ateak aurten irekitzea aurreikusten du Udalak, eta, bide horretan, atzo urrats bat gehiago eman zuten, Albaolarekin hitzarmena sinatu eta gero. Akordioak jasotzen duenez, datozen lau urteetan Albaolak izango du Mutiozabal ontziolaren kudeaketaren ardura.
Errio bazterrean hezkuntzari lotutako proiektu bat abiaraztea da hitzarmenaren xedea, eta, ekainean, herriko bi ikastetxeekin egingo dute proba pilotua. Irailetik aurrera, berriz, eskola guztiek izango dute Mutiozabalera bertaratu eta Orioko itsas ondarearen ezagutzan sakontzeko aukera.
Ontzigintzari buruzko unitate didaktikoak landuko dituzte ikastetxeekin, eta ontziolan bertan benetako egurrezko ontzi bat eraikitzeko esperientzian parte hartuko dute ikasleek. Ala izeneko ontzi tradizionalak izango dira, Oria ibaiaren bazterretan zeregin askotarako erabili izan zirenak (pertsonen, abereen zein materialen garraiorako, esaterako).
2003tik itxita
2003an laga zuten Mutiozabaleko jarduera hango langileek. Azken hamarkadetan ontziak konpontzen jardun zuten batez ere, 1968an bota baitzuten uretara han egindako azken ontzia. 2018an Eusko Jaurlaritzak monumentu kategoriako kultura-ondasun izendatu zuen, eta Udalak 2019an erosi zuen eraikina. Ordutik, hura berreskuratzeko lanak egin dituzte, eta Biziberritze Planaren baitan, hezkuntza proiektua martxan jarriko dute datozen hiletan.
Usadiozko lanbideak gogoratzeaz gainera, ontziak erriora uretaratzen ikusteko aukera ere izango da han.