Naziogintza taldeak gogorarazi duenez, gaurko egunez, duela 91 urte, Euskal Errepublika aldarrikatu zuen Orioko Udalak, mozio baten bitartez. Espainiako Errepublika ezarri eta egun batzuk geroago egin zuen Orioko Udalak aldarrikapen hori, 1931ko apirilaren 25ean.
Oriokoa ez zen kasu isolatua izan, 1931ko apirilean Euskal Herriko beste udal askok ere Euskal Errepublika eskatu baitzuten Euskal Herriarentzat: Zumaiakoak, Zestoakoak, Azpeitikoak, Bergarakoak, Hernanikoak, Bermeokoak, Errenteriakoak eta Markinakoak, besteak beste.
Horren harira, "Euskal Herriaren historia hurbileko pasarte ezezagun hori gogorarazteko eta Euskal Errepublikaren beharra gaur egun ere aldarrikatzeko", ekitaldi irekia egingo du Naziogintza taldeak maiatzaren 7an, Azpeitian. 12:00etan, plazan hasiko dituzte ekintzak, eta ondoren, 12:30ean, Sanagustin kulturgunean jarraituko dute egitarauarekin. "Euskal herritar guztiak" gonbidatu dituzte ekitaldian parte hartzera. "Izan zirelako gara, garelako izango dira", adierazi du Naziogintza taldeak.