Iragan asteburuan ere mugitua izan da Orio Arraunketa Elkarteko kirolari eta boluntarioentzat, hitzordu ugari izan baitituzte han eta hemen. Harrobiko ia 90 arraunlari Frantzian izan dira, aulki mugikorreko Libourneko Nazioarteko Estropada lehiatzen. Alebin, infantil eta kadete mailetan, denera, Orioko hamasei ontzik parte hartu dute, eta baita hiru garaipen lortu ere, denak alebinen mailan: bata, mutilen bakarkako skiff kategorian; bestea, nesken lemazaindun binako laukoetan; eta hirugarrena, mutilen lemazaindun binako zortzikoetan.
Bakarkako garaipena erdietsi duena Joel Lizeaga izan da; lauko txapelduna Ariane Gaztañazpik, Aroa Iraetak, Malen Etxanizek, Itxaso Olaizolak eta Mikel Barranco lemazainak osatu dute; eta zortzikoa, Mikel eta Alex Barrancok, Iraia Peñak, Oier Urrestillak, Xabat Britek, Txomin Etxeberriak, Beñat Arrillagak, Ane Muruamendiarazek eta Jon Barranco lemazainak.
Absolutuen mailako gizonezkoek, berriz, hiru hitzordu izan dituzte asteburuan. Larunbat goizean, Orioko zortzikoak aulki mugikorreko Euskadiko Txapelketa jokatu zuen Legution (Araba), eta bigarren egin zuen, txapeldun izan zen Hondarribiarengandik segundo eta erdi eskasera bukatuta.
Beste bi hitzorduak Gipuzkoako Trainerila Ligakoak izan dira. Larunbat arratsaldean ligako hirugarren jardunaldia jokatu zuten Hondarribian, eta igande goizean laugarrena Zarautzen. Hondarribian bederatzigarren egin zuen Orio A taldeak, eta Zarautzen hirugarren. Ligako jardunaldiaz gain, Gipuzkoa Federazio Kopakoa ere jokatu zuten Zarautzen, eta Orioko bi taldek (B eta C) parte hartu zuten. Orio B izan zen azkarrena, eta Orio C-k laugarren amaitu zuen.