Aurrerantzean, Aritzaga kalean egongo da Orioko Turismo Bulegoa. Orain arte Piliku plazan egon izan da, baina lekualdatzea erabaki du udalak, zerbitzua hobetzeko helburuarekin. Horrela, Turismo Bulegoa "bisitariengandik hurbilago" egongo dela uste du udalak, eta irisgarriagoa izango dela.
Kokaleku berria, baina ordutegia lehengoa izango du hemendik aurrera ere. Asteazkenetik larunbatera 9:30etik 13:30era eta 16:00etatik 19:00etara egongo da zabalik, astearte eta igandeetan 9:30etik 13:30era, eta astelehenetan itxita. Ekainaren 13tik aurrera, udako ordutegia izango du.
Balearen Egunean, bisita gidatua
Larunbatean, 10:00etan hasita, herriko itsas ondarea ezagutzeko bisita gidatua egingo dute Begi Bistanen bidez. Parte hartu nahi dutenek Turismo Bulegoan eman beharko dute izena: bertara joanda, 943-83 55 65 telefono zenbakira deituta edo orioturismo@gmail.com helbidera idatzita.