Kontxako Bandera estandarte gisa harturik, batera eta bestera astinduz, dantzari iritsi ziren udaletxe aurrera Orioko txapeldunak, eta jostari aritu ziren biraka, "Aupa Orio!" oihukatuz. Jarraian, familia argazkia atera zuten, historia liburutan ongi erregistratzeko: 2022ko Kontxa Orio-Orialkik irabazi zuen. Inork ez dezala ahaztu!
Gainezka zegoen elastiko horidun herritarren begiradapean, dantzariek Agurra eskaini zieten Patxi Francesen arraunlariei, talde tekniko osoari eta arraun elkarteko kideei. Jarraian, udaletxeko batzar aretoan ohiko harrera, eta balkoira irten ziren bandera preziatua astintzera banan-banan.
Nadeth Agirre patroiak eta Patxi Frances entrenatzaileak hartu zuten hitza, eta denboraldi bikainaren fruitua izan dela azpimarratu zuten atzoko lorpena. Era berean, herriaren babesa eskertu zuten, eta, nola ez, herritarrei eskaini zieten garaipena. Bukaeran, taldeak eta zaletuek elkar egin da Mirotza abestia kantatu zuten.
