Jakina denez, Albaola Itsas Kultur Faktoria arduratuko da Mutiozabal ontziolaren kudeaketaz, eta harako prestatu duen proiektuaren aurkezpen irekia egingo dute bihar arratsaldean. Ekitaldia kultur etxeko areto nagusian izango da, 18:00etan hasita, eta nahi duten herritar guztiek izango dute ekitaldira sartzeko aukera.
Orioko eskoletako ikasleak aste honetan hasi dira lanean erriberako ontziolan, eta azaroaren 18ra arte jardungo dira bertan. Ondoren, eskualdera eta Euskal Herri osora zabalduko da ekimena, Orioko ontziolek sektorean zuten pisua eta erabiltzen zuten sistemaren balioa azpimarratuko dituen unitate didaktiko baten bidez. Ekimenaren helburua izango da ontzigintza tradizionala iraunaraztea, eta belaunaldi berriei horren berri ematea. Biharko ekitaldian emango dituzte proiektuaren inguruko gainontzeko xehetasunak.