Euskal Eskola Publikoaz Harro plataformak manifestazioa deitu du biharko Eusko Jaurlaritza lantzen ari den Hezkuntza Legeari "ezezko borobila" emateko, Hezkuntza publikoaren alde. Hezkuntza Lege honi, ez! lelopean. Manifestazioa 17:30ean abiatuko da Bizkaiko hezkuntza ordezkaritzatik, eta aldarriarekin bat egin dute hezkuntza publikoaren arloan lan egiten duten hogei bat eragileek eta Araba, Bizkaia eta Gipuzkoako zentroek, tartean Orioko Zaragueta Herri Eskolak.
Plataformak uste du Hezkuntza Legearen helburua eskola publikoa defendatzea izan behar duela, baina salatu dute irailean Eusko Jaurlaritzak ezagutarazi zuten aurreproiektuaren lehen zirriborroa ez doala bide horretatik: "Sare publikoaren alde zenbait adierazpen jasotzen dituen arren, bere beharrei erantzun egokirik eman gabe jarraitzen du", azaldu zuten urriaren 13an Bilbok egin zuten prentsa agerraldian. Uste dute gizarte kohesio eta berdintasunezko hezkuntza euskalduna lortzeko, eskola publikoak izan behar duela sistemaren "benetako ardatza", eta horretarako "zentzuzko planifikazioa" egitea eta "sare publikoari beharrezko baliabide guztiak ematea" eskatzen dute, baita "ikastetxeak publifikatzeko bideak zabaltzea" ere.