Angularen arrantzaren debekuak hautsak harrotu ditu, eta Gipuzkoako Elkarrekin Podemosek ebazpen-proposamen bat erregistratu du angularen interpretazio zentroa sortzeko azterlana egiteko eskatuz. Izan ere, koalizioarentzat garrantzitsua da mendetan zehar belaunaldiz belaunaldi transmititu den angularen arrantza ezagutaraztea. Interpretazio zentroan bilduko litzateke Gipuzkoako itsasadarren eta estuarioen inguruko informazioa eta aingiraren ziklo biologikoari buruzko erakusketa iraunkorra, baita angula arrantza tradizionalean arrantza egiteko modua eta erabiltzen dituzten tresnak ere.
Horrez gain, bihar egingo den Gipuzkoako Batzar Nagusietako osoko bilkuran, Euskal Autonomia Erkidegoan aingira europarra berreskuratzeko kudeaketa plana defendatuko dutela ere adierazi du Elkarrekin Podemosek ohar bidez. "Eusko Jaurlaritzako Arrantza Sailak sortutako neurria da, angulazaleekin eta gaian adituak diren zientzialariekin elkarlanean landua, baina ez du Gipuzkoako Foru Aldundian agintzen duten alderdien babesik".