Asteazkenean, Kirolaz Haratago izeneko argazki erakusketa zabaldu zuen Gipuzkoako Kirol Egokituko Federazioak Orioko Kultur Etxean, eta aurkezpen ekitaldian izan ziren federazioko kideak, Orioko Udaleko eta Berdin Berdinak elkarteko ordezkariak, eta hainbat kirolari.
Argazki erakusketa Orio Denontzat egitasmoaren barruan antolatu dute. Izan ere, pasa den urtean parte hartze prozesu bat abiatu zuten Gipuzkoako Kirol Egokituko Federazioak eta Orioko Udalak, herrian desgaitasunaren eta aniztasunaren inguruan zer errealitate dagoen ezagutzeko; herriko irisgarritasuna nola hobetu daitekeen hausnartzeko ere bai. 
Ondoren, irailean, sentsibilizazio saioak egin zituzten herriko bi eskoletan, ikasleei aniztasunaren inguruan begirada zabaltzeko asmoz. Kirolaz Haratago argazki erakusketa ere Orio Denontzat egitasmoaren barruan antolatu dute. Federazioak azken urteetan egin dituen txapelketa eta jardueretan Fernando Zamarbide argazkilariak ateratako argazkiak bilduta daude, eta herritarrak gaiarekin sentsibilizatzea du helburu. Egitasmoari amaitzeko, Ibon Oregi kirolariak hitzaldia eskainiko du otsailaren 8an, 17:30ean hasita.
Prozesu "aberasgarria"
Gipuzkoako Kirol Egokituko Federazioko arduradunen esanetan, Orioko Udalaren parte hartzea "oso garrantzitsua" izan da bide horretan. Anuska Esnal Orioko alkatearen iritziz, prozesua "aberasgarria" izan da. "Udalean irisgarritasun planak baditugu, eta agintaldi honetan hainbat esku hartze egin ditugu herria egokitzeko: zebrabideak igo eta ate automatikoak jarri, esaterako". Hala ere, orain arteko plan horiek teknikariek eta politikoek erabakitakoak izan dira, eta herritarren ahotsa falta zaie, bereziki, egunero zailtasun horiek gainditu behar dituzten pertsonena. Horregatik, udalak parte hartze prozesua abiatu zuen federazioarekin elkarlanean, udalari garrantzitsua iruditzen zaiolako "herritarren bizipenetan oinarritutako ekarpena" oinarri izatea datozen irisgarritasun planak garatzeko.
Gainera, egitasmoarekin hiru ildotan eragitea lortu dutela nabarmendu zuen Esnalek: batetik, udalean, baina baita hezkuntzan, eta herritarrengan ere. "Uste dugu erakusketara etorriko diren herritarrek kirola beste begirada batetik ikustea, herria eraldatzeko beste modu bat dela". Aurkezpena bukatzeko, kirolak eman diona azaldu eta bertsoa bota zuen pilota egokituko jokalari Joseba Altunak.