Udalak hala erabakita, aurrerantzean desfibriladore bat eramango du aldiro udaltzaingoaren autoak, larrialdi egoeretan erantzun azkarrago bat eman ahal izateko. Hala, guztira bederatzi desfibriladore izango dira herrian.
Orain arte honako toki hauetan zeuden instalatuta: Zaragueta eskolan, ikastolan, futbol zelaian, zaharren babeslekuan, kanpinean, arraunetxen, kiroldegian eta Portu Zuzendaritzak jarritakoa, kirol portuan. Horiei guztiei bat gehituko zaie: udaltzaingoak autoan eramango duena.
Edozeinek erabiltzeko prestatuta
Desfibriladorea edozeinek balia dezake, prestakuntza egokia jasoz gero. Gainera, larrialdi batean, erabiltzeko prestakuntza jaso duen inor inguruan ez badago, gaur egungo desfibriladoreek aukera ematen dute mediku baten urrutiko laguntza jasotzeko. Hartara, medikuak gidatuko du erabiltzailea, desfibriladorea egoki erabil dezan.