Astearen hasieran antxoa izan bada protagonista, herenegun berdela sartu zen euskal kostaldera. Joera hori ohikoa dela azaldu du Emeterio Urresti Getariako Elkano kofradiako presidenteak: "Hain zuzen ere, berdela arrain harrapakaria da, eta antxoa jaten du; aurreko egunetan azken hori bilduta, ageria zen kostalderaino sartuko zela berdela jarraian".
Getariako portura, esaterako, 490.000 kilo berdel sartu ziren herenegun, "tamaina onekoak", Urrestiren iritziz. Hori ere normaltzat jo du: "Lehenengo aleak betiere handiagoak izaten dira, ondoren etortzen direnak baino".
Antxoa ere mara- mara
Antxoaren kostera hasi zenetik igaro diren bi asteetan euskal arrantzaleek gehien harrapatu duten eguna izan zen asteazkenekoa. Getariako portura, esaterako, 115 tona sartu ziren; euskal kostaldeko portu guztiak aintzat hartuta, berriz, 380 tona.
Gainera, eguneko gehienezko mugara iritsi dira ia ontzi denak; 8.000 kilora, alegia. Horren harira, gogoratu behar da iaz baino antxoa gehiago arrantzatu dezaketela euskal arrantzaleek; izan ere, berdela gehiegi arrantzatzeagatik Europako Batzordeak Espainiari 2013an jarri zion zigorra nabarmen txikitu da 2022tik 2023ra. Zentzu horretan, %17 gehiago arrantzatu dezakete aurten Espainiako bandera daramaten arrantza ontziek, tartean Gipuzkoakoek eta Bizkaikoek.