Irailaren 27tik 29ra izango dira Gazte Festak, eta behar ekonomikoei erantzun ahal izateko, antolatzaileek tonbola prestatu dute biharko. Herriko saltokiek emandako produktuak zozketatuko dituzte, 19:30etik 21:00etara, plazan. Bestalde, bertan salduko dituzte hilaren 28ko paella lehiaketarako txartelak, 12 euroan. Salmenta puntu bakarra izango da.
Irailarekin iritsiko da Euskal Herriko V. Sagardo Txapelketa Herrikoia, eta Aiako bi sagardotegik parte hartuko dute lehian: Satxotak eta Izetak. Aurtengo edizioan lau finalaurreko egingo dituzte, eta ondoren finala. Guztira, 41 sagardotegi izango dira V. Sagardo Txapelketan. Herritarrek finalaurreko horietan epaimahai lanak egin ahal izango dituzte; izan ere, afaritara joaten diren herritarrek sagardoak dastatzeko eta horiei puntuazioa emateko aukera izango dute. Dagoeneko salgai daude finalaurrekoetarako eta finalerako txartelak, 26 euroren eta 32 euroren trukean, hurrenez hurren. Informazio gehiago, honako lotura honetan eskura daiteke.
Formatu txikiko 20 bat eskultura eta 10 bat margolan izango dira ikusgai Xebas Larrañagaren erakusketan. Eskulturak zurez, harriz, brontzez eta buztinez egiten ditu artistak; eta margolanak, berriz, olioz, akuarelaz nahiz arkatzez. Egin dituen lan gehienak figuratiboak dira, baina eginak ditu eskultura abstraktoak ere. Orion erakutsiko dituen lanen artean, besteak beste, Manuel Lasarteren koadro bat dago, baita Benito Lertxundiren irudiarekin egiten ari den buztinezko busto bat ere. Astegunetan izango da zabalik, arratsaldez, 17:00etik 20:00etara.