Udaletxeko batzorde aretoan bilduko dira gaur EAJko eta EH Bilduko zinegotziak. Lau gai jarriko dituzte mahai gainean, eta ondoren, galdera eta eskarien txanda irekiko da.
Lehendabizi, urriaren 13ko plenoko akta onartuko da. Horren ondoren soka luzea ekarri duen eta korapilatsua izaten ari den gaiari helduko diote: Elkano auzoko frontoi eta elkarte egitasmoa onartu eta desjabetzaren behin betiko onarpena. Orain arte ekimen honen alde azaldu dira EAJ alderdikoak eta kontra Bildukoak.
Hirugarren puntua 2015erako ordenantza fiskalena izango da. Ondoren, Bildu taldeak aurkeztutako mozioak izango dira eztabaidagai. Fracking teknikaren aurkako kezka aspalditik dute Bildu alderdikoek eta honen gaineko mozioa aurkeztu zuten Udalean. Baina hau ez da aurkeztu duten mozio bakarra, Kataluniako kontsulta eta Konstituzio-Auzitegiaren erabakia ingurukoa ere aurkeztu baitute, baita Kutxabanken fundazio izaeraren gainekoa ere.
Azkenik, eskari eta galderen txanda izango da.