Aristerrazu Zuzenean egitasmoko denboraldiko azken saioa egingo dute bihar

Saio berezia izango da,  'online' jaialdi erraldoia prestatu baitute bihar arratsalderako.

Aiako Andatza auzoko Aristerrazu erromeria leku ezaguna da. Urritik ekainera, igandero erromeriak antolatu ohi dituzte han. Pandemia egoerak zuzeneko erromeriak bertan behera uztera behartu zituen antolatzaileak, baina, hala ere, ez diote erromeriak egiteari utzi. Antolatzaileen eta trikitilarien borondateari esker, eta zaleen gozamenerako, pasa den udaberrian Aristerrazu Zuzenean ekimena jarri zuten martxan, eta ia igandero online erromeriak eskaini dituzte Aristerrazu Zuzeneanen Facebook kontutik.

Denboraldiaren bukaerara iritsita, 2020-2021eko erromeria denboraldiari amaiera borobila emateko trikitilariek bukaerako festa erraldoia prestatu dute biharko, eta eskualdeko hainbat trikitilarik parte hartuko dute. Honakoak dira jaialdian parte hartuko duten trikitilariak: Saioa Lizarralde eta Maddalen Arzallus; Alaitz Roteta eta Ainara Saizar; Laja eta Lutxurdio; Manex Torrealdai eta Kattalin Zubizarreta; Izer eta Alabier; Mirari Azkune eta Aintzane Agirrebeña; Harkaitz, Miren eta Agurtzane; Imanol Intxausti eta Andoni Ezkerra; Elizagoien ahizpak; Ostolaza eta Narbaiza; Jone Uria eta Julene Otegi; Lanberri eta Naiara Urresti; Aritz Erasun eta Aitziber Arruabarrena; Irma eta Amets; Miren eta Roberto Etxebarria; Eneko Dorronsoro eta Lohitzune Berastegi; eta Ansorregi eta Larrañaga.

Saioa Aristerrazu Zuzenean Facebook kontuan jarraitu ahal izango dute zaleek, 18:30etik 21:30etara.

KARKARAk zu bezalako irakurleen babesa behar du aurrera egiteko. Orain arte bezala, kalitatezko eduki libreak eskaini nahi dizkizugu. Euskaraz informatzea da gure eginkizuna, eta zure eskubidea. Izan zaitez KARKARAko laguntzaile, urtean 40 euro besterik ez dira!


Izan zaitez KARKARAko laguntzaile!