Aiako Udalak aspaldikoa du Lardizabal eremua berritzeko asmoa, eta lanak hainbat fasetan egiteko erabakia ere aspaldi hartu zuen, baina pandemiak eragindako salbuespen egoera tarteko, ezin izan ditu asmo horiek nahi bezala gauzatu. Orain, unea iritsi dela iritzita, martxan jarri ditu lanei ekiteko beharrezko prozedurak, eta lehen faseko obrak esleitzeko lehiaketa abiatu du. Hain zuzen ere, Lardizabal eremuan dagoen udal aparkalekua egokitzeko lanak dira esleitu nahi dituenak.
Proposamenak aurkezteko epea zabalik dago dagoeneko, eta astebete barru itxiko dute; zehazki, urtarrilaren 31n, datorren astelehenean.
Aparkalekua berritzeko lanen gehienezko aurrekontua 85.351 eurokoa izango da, BEZ barne, nahiz eta enpresek eskaintza hobea egin diezaioketen udalari. Behin lizitazio prozesua gauzatuta eta esleipena eginda, lanak gauzatzeko ardura hartzen duen enpresak sei asteko epea izango du horiek bukatzeko, kontratua sinatu eta hurrengo egunetik kontatzen hasita.
Lehiaketan parte hartzeko interesa duten enpresek, udalaren webgunean dute informazio gehiago.