Haur eta gaztetxoentzat binakako esku pilota txapelketa antolatu dute Aiako Urdaneta auzoan. 6 eta 16 urte arteko herritarrek parte hartu ahal izango dute, eta baldintza bakarra egongo da: gutxienez bikotekideetako bat aiarra izatea.
Izena emateko azken eguna da gaurkoa, eta animatzen direnek mezua idatzi beharko dute urdanetaauzoa@gmail.com helbidera. Parte hartuko dutenen izen-abizenak eta harremanetarako helbide elektroniko bat eta telefono zenbaki bat adierazi beharko dira mezu horretan.
Antolatzaileek jakinarazi dutenez, izena ematen dutenen adinaren arabera antolatuko dituzte taldeak.
Txapelketaren egutegia, berriz, zehaztuta dago: partidak urriko larunbat eta igande arratsaldeetan izango dira eta finalak, berriz, San Martin jaietan.