Joseba Iraolarena zen orain arteko Andatzatik Aiara Igoeran lortutako denborarik onena. Bera zen proba irabazteko faborito nagusia. Halaxe azaldu zuten astean zehar antolatzaileek igoeraren XVI. edizioa aurkezteko ekitaldian, eta aurreikuspenek ez zuten hutsik egin.
Aurtengoan, ordea, ez du lortu iazko marka hobetzea, baina berarena izan da denborarik onena. Hain zuzen ere, 1:40.319ko denbora lortu zuen atzo, iaz baino segundo bat gehiago kasik. Hala ere, bere aurkari zuzenak urruti utzi zituen, denbora tarte nabarmenarekin; zentzu horretan, aise irabazi zuela esan daiteke.
Iraola jaun eta jabe izan zen errepidean, jarleku bateko ibilgailuen mailan, eta bere atzetik gelditu ziren, aurreko urtean bezala, Arkaitz Ordoki eta Garikoitz Flores. Ordokik 1:46.935eko denbora egin zuen, eta bere atzetik izan zen Flores. Berak 1:51.757ko denboran amaitu zuen proba.
Ezbehar bat ere gertatu zen atzoko proban. Hain zuzen, Jose Antonio Lopez Fombonak istripua izan zuen bere autoarekin, eta ibilgailuren aurrekaldea erabat apurtuta geratu zen kolpearen ondorioz.
Hona hemen atzoko probaren sailkapena.