Pleno aretoa herritarrez beteta eta zinegotziek beren eserlekuak hautatu ondoren ekin diote Aian kargu hartzeko ekitaldiari. Igor Iturain idazkariak gidatu du protokolozko ekitaldia, eta udalaren kontuen berri eman ondotik ekin diote alkate berria hautatzeari.
Ez da ezustekorik izan, eta Jon Ander Azpiroz EAJren alkategaiak jaso ditu boto gehien. Datozen lau urteetan Azpiroz izango da Aiako alkatea, eta berekin batera osatuko dute Udal Gobernua Miriam Sarasolak, Josu Lizasok, Ainara Saizarrek, Garazi Eizmendik eta Lorenz Orbegozok. "Aiako herri maitearen alde" lan egingo dutela hitz eman die Azpirozek herritarrei.
Oposizioan izango dira, berriz, EH Bilduko lau ordezkari –Aitor Arregi, Irati Eizagirre, Gontzal Aldai eta Iñaki Gurrutxaga– eta Aiako Batzarre Burujabetzako bakarra, Roman Beloso. Arregik aldaketa izan du hizketagai bere hitzartzean, baina baita elkarlana eta udaletik kanpo herritarrekin lan egiteko gogoa ere. Belosok, berriz, gogorarazi nahi izan du "ez direla alderdi politiko bat", eta Arregik aipatu bezala, herritarrekin batera bidea egiteko borondatea erakutsi du.