Iturraran Parketxeak saio berezia antolatu du Basoen Nazioarteko Egunaren baitan. Baso Bainua izeneko jarduera egingo dute igande honetan, Iturraran Parketxean.
Baso Bainua naturan murgilduz, eguneroko erritmo bizia "moteltzen laguntzen duen esperientzia sentsoriala" dela azaldu dute antolatzaileek. "Inguruari so egin eta hura laztandu, usaindu, dastatu eta entzun; bost zentzumenak eta naturako elementuak elkarrekin jolasean jarriko ditugu", zehaztu dute. Hala, parte-hartzaileek jarduera hori egiteko behar duten gauza bakarra "erritmo pausatu batean arnasa hartzea, inguruneaz gozatzea eta txunditzeko gaitasunaz oroitu nahi izatea" dela azaldu dute.
Hitzordua igande honetan izango da, 11:00etatik 13:00etara bitartean, Iturraran Parketxean. Doakoa izango da saioa, baina aldez aurretik erreserbatu egin beharko da iturraran@gipuzkoanatura.eus helbidera idatzi edo 943-83 53 89 telefono zenbakira deituta.