Pasa den larunbatean Gatiburen kontzertuan eman ziren eraso sexistak "ozen" salatzeko, manifestazio zaratatsua deitu du gaur arratsalderako Aiako talde feministak. 19:00etan elkartuko dira herriko plazan, eta herrian zehar ibili ondoren "ekitaldi xume" batekin amaituko dute hasitako leku berean. Bertan testu bat irakurriko dute, eta erasoa jasan zutenei "babes osoa" eskainiko diete.
Aiako Udalak bat egin du deialdiarekin, eta Gipuzkoako Foru Aldundiak adierazpena kaleratu du, Aian salatutako eraso matxistak arbuiatuz. Foru erakundeak, "elkartasun osoa eta babesa eskaini nahi die eraso horiek pairatu dituzten emakumeei, nahiz haren gertuko lagun eta senitartekoei", dio adierazpenak. Eta, halako erasoen oinarrian "gizon eta emakumeen berdintasun eza" dagoela salatu dute;"emakumeak kontrolpean izan nahi dituzten jarrera eta ideia matxistak", gaineratu dute. Aldi berean, emakume guztiek aisialdiaz eta gizarte harremanez "askatasun osoz gozatzeko eskubidea" dutela azaldu dute, eta horregatik, "indarkeria sexistarik gabeko kale, auzo, udalerri eta hiriak" nahi dituztela.
Nerea Isasi, Berdintasuneko foru zuzendariak parte hartuko du manifestazioan.