Udaren zati eder bat Orion egin ohi du azken urteetan Gure Zirkuak, eta ETB1 telebista kateak igandean estreinatu zuen Gure Zirkua heldu da saio berriko lehen atalean ere Orio izan zen protagonista: airetik hartutako irudi ederrak eta furgonetarekin zeharkatutako kaleak agertu ziren saioan, baita zenbait herritar ere.
Dokumental kutsuko saioan euskal zirkuaren erraiak erakutsiko dituzte Iker Galartza zirkuaren sortzailearen eskutik, eta Sua Enparantza izango da beste protagonista nagusia. Irabazi arte telesaileko aktoreak zirkua barrutik ezagutuko du, eta denen artean, bertan lan egiten erakutsiko diote.
Saioaren bigarren atalean, Orio utziko du Gure Zirkuak, eta Nafarroarantz abiatuko dira artistak.