Bi zatitan banatzen da Zorione Mendezen Bi Txoriburu proiektua. Ekainean modaren inguruko lanketa egin zuen, bertako diseinatzaileen lanekin egindako erakusketa-salmentarekin. Proiektuaren bigarren zatia ikusgai egongo da datorren astelehenetik aurrera: Bi Txoriburu, artea.
Bertako artisten lanekin erakusketa-salmenta antolatu du Usurbilgo Sutegiko erakusketa aretoan. Abenduaren 14tik 27ra bitartean arlo desberdinetako artelanak egongo dira ikusgai: argazkigintza, bideogintza, pintura, serigrafia, fanzineak, eskultura, grabatuak... Orioko Nerea Urdangarinen lanak ere bertan izango dira.
Astelehenetik ostiralera 17:00etatik 20:00etara irekita egongo da erakusketa; asteburuetan, berriz, 11:00etatik 13:00etara eta 17:00etatik 20:00etara.