Izarak pega-pega eginda, esnatuta baina jaiki ezinik. Jaialdiaren biharamunean biharamun galanta nuen, buruko mina ez ezik gorputzeko giharrak ere minbera. Festibala ona eta ajea primerakoa.
Musika kontsumitzera joan eta musika baino alkohol gehiago kontsumitzeak bi arrazoi izan ditzake,nire kasuan, behintzat:
1. Jotzen ari direna ez gustatzea eta kontzertuko masatik barrako jendartera joatea.
2. Musikak parrandarako aldarte ederrean jartzea, dantza nahi adina egitea eta hidratatzeko alkohola ura bailitzan edatea. Elkarrenganako eragina du, hau da, kasuistika honetan elkar elikatzen dira musika eta edana.
Eta, Gure Bazterrak jaialdian, mozkorraldiaren kausa biak izan ziren. Hasieran, ezin berotan sartu: Ghost Number & His Tipsy Gypsies paper markatuegiekin, Bi Bala tonua harrapatu ezinik eta Joe La Reina hirugarrena izateko melodikoegi. Hotzetik berora pasa, eta beroaldia Joseba B. Leinor Gangekin. Dantza franko. El_Txef_Arekin dantzaldiak segi zuen, festa ezin gelditzeraino.