1983. urtean Juan Mari Beltran, Karlos Garaialde eta Pedro Mari Santos Euskal Herriko festen inguruko elkarrizketak egiten aritu ziren, Eusko Ikaskuntzaren Folklore Sailak bultzaturiko ikerketa baterako. Orion, Sarobe baserriko Jose Peña Gozategi elkarrizketatu zuten, eta hark eman zien Orioko Silla dantzari buruzko informazioa.
Dantzaren jatorrizko musika bere aita Antoniok jotzen zuen baserrian, dultzainarekin. Inguruko baserrietan, txistu, akordeoi edo aho soinuarekin jota egiten omen zen silla-dantza, eta instrumenturik ez bazen, partaideen kantu eta txaloekin.
Silla-dantzak bi zati ditu: dantza eta jokoa. Lehen zatian, partaideek dantza egiten dute aulkiak beti ezkerraldean utziz, aurreraka oinez, besoak goran dituztela. Hirunaka ematen dituzte pausuak, eskuinera eta ezkerrera. Doinua hainbat aldiz errepikatu ondoren, bigarren zatia hasten da, jokoarena.
Zati honetan, nolabait, irabazleak eta galtzaileak izaten dira: nahastu eta galdu egiten direnak, mantsoenak eta azkarrenak, edo korrika horretan harrapatzen dituztenak.
Larunbatean, nahikoa barre eta algara egin zituzten Anibarko Portuan, aspaldiko dantza berreskuratzeko aitzakian.