karkara.eus

Orioko Bate Bizkorrak Valentziako Projecte taldeari gailendu zitzaion asteburuan

  kirola  Orio

Igandean Mendibeltzen jokatutako jardunaldian, 3-2 eta 5-0 emaitzekin lortu zuten garaipena OBB taldeko jokalariek.

Jokatutako lehen partidan, 3-2 emaitzarekin gailendu zen OBB, lehia oso orekatua izan ostean. Oriotarrek aurrea hartu zuten markagailuan, lehen sarreran karrera bat egitea lortuta. Projectekoek bigarrengoan berdindu egin zuten partida. Markagailua berdindua egon zen laugarren sarrera bitartean, zeinean Uxua Modregok puntu bat gehiago lortu zuen. Azken sarreran bi taldeek puntu bana lortu zuten, partida oriotarren aldeko 3-2 emaitzarekin bukatuz.

Jardunaldiko bigarren norgehiagokan, OBB nagusitasunez gailendu zitzaien kataluniarrei. Partida 5-0 emaitzarekin bukatzea lortu zuten. Nabarmentzekoa jardunaldian zehar Uxua Modregok, Maria Caicoyak, Uxua Zorozak, eta batez ere, Kelly Lovatok egindako lana.

Bi partida hauek irabazita, OBB sailkapen nagusiko laugarren postuan da. Igande honetan, Valentziako Fénix izango dute aurkari Mendibeltz zelaian. Lehen faseko azken jardunaldia izango denez, norgehiagokak garrantzia handia du oriotarrentzat, honen arabera sailkatuko direlako hurrengo faserako.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa