Prekarietatea salatzeko bi orduko lanuzteak deitu ditu LABek asteazkenerako, maiatzaren 30erako. Herriz herri elkarretaratzeak deitu ditu sindikatuak 12:45etik 13:15era, eta Orioko kontzentrazioa herri sarrerako biribilgunean egingo dute Estatalizazioa=prekarizazioa. Lan marko propioaren alde lelopean.
LABek azaldu duenez, sindikalismoak “erronka garrantzitsua” du prekarietateari eta pobrezia egoerari kalean erantzuna emateko, eta horregatik deitu ditu mobilizazioak. “Argi dugu Euskal Herrian aldaketa sozialaren alde dagoela gehiengo handi bat, eta kalean ari gara hori aldarrikatzen; emakumeak, pentsiodunak, lan gatazkak dituzten enpresetako langileak eta Maiatzaren Lehenean kalera irtendako lagunak dira horren adibide”. Orain, baina, Lan Harremanetarako Euskal Esparruaren alde eta estatalizazioaren nahiz prekarietatearen aurka dauden pertsonak mobilizatzea nahi du LABek.
Prekarietatea eguneroko kontua dela azaldu du sindikatuak, eta salatu du estatalizazioaren bidez “prekarietatea geldiarazteko bideak mugatu” nahi dizkietela. “Estatalizazioa euskal langileoi estatu mailako lan baldintzak aplikatzeko estrategia da, eremu pribatuari edo langile publikoei dagokienez; gure lan hitzarmenek arautzen dituzten lan baldintzak ez betetzeko eta merkeagoak eta okerragoak diren baldintzak inposatzeko estatu estrategia”. LABek azaldu duenez, modu horretan patronalaren etekinak biderkatzen jarraitu nahi dute eta Madilgo sindikatu eta indar korrelazioen araberako naldintzak inposatu nahi dituzte, euskal langileei erabakitzeko eskubidea ukatuta.
Sindikatuak ohartarazi du estatalizazio eta prekarizazio prozesuaren menpe jarraituko dutela, lan eremuan burujabetza eskuratzen ez badute. Horregatik, argi du Euskal Herrian hartu behar direla lan eta bizi baldintzen inguruko erabakiak. Horrenbestez, estatalizazioaren kontrako jarrera agertzeko eta lan baldintzak Euskal Herrian arautzeko eskubidea aldarrikatzeko herritarrei mobilizazioetan parte hartzeko deia egin die LABek.