Zerga Administrazioko Estatu Agentziak tabako kontrabandorako talde bat desegin zuen 2013ko abenduan. Taldea Euskal Herrian finkatua zegoen, tartean ziren Orioko hainbat bizilagun, eta Europatik kanpo eskuratutako tabakoa kontrabandoan sartzen zuten Britainia Handian, Irlandan eta Espainian. Efe agentziak jakinarazi duenez, auziaren epaiketa egin da azken astetan, eta epaituek onartu egin dituzte leporatzen zaizkien karguak, tabako kontrabandoa eta talde kriminal bateko kide izatea, hain zuzen ere. 3-4 urteko espetxe zigorra ezarri die epaileak eta 4,5 milioi euroko isun ekonomikoa ordaintzea onartu dute, konfiskatu zieten tabakoa 5 milioi eurotan baloratuta zegoela kontutan hartuta. Dagoeneko aurreratu dute milioi bat euro.
Menorcan geldiarazi zuten White Eagle atoiontzia 2013ko abenduaren 5ean 350.000 tabako kaxa –1,4 milioi eurotan baloratua– ontziz aldatu nahian ari zirela. Dena dela, epaiketan fiskaltzak nabarmendu du 2012 eta 2013 urteetan gutxienez bost bidaia egin zituztela tabakoa legez kontra garraiatuz.