Hurrengo larunbatean, abuztuak 3, Oriotik igaroko da Donostiako Klasikoa txirrindularitza lasterketa. Bi lasterketa izango dira, emakumezkoena eta gizonezkoena, eta biak pasatuko dira Oriotik egunean zehar. Hala, zenbait aldaketa izango dira ibilgailuen zirkulazioan.
Alde batetik, Benta bidea itxita egongo da ibilgailu guztientzat 11:00etatik 17:00etara. Dena den, momentu jakinetan, bertan bizi direnei pasatzen utziko zaie. N-634 errepideari dagokionez, Donostiarako bidea itxi egingo dute 11:30etik 13:30era eta 16:00etatik 17:00etara. Zarautzerako bidea, aldiz, 11:30ean itxiko dute, eta berriz irekiko dute gizonezkoen lasterketa amaitzean, 13:00ak aldera.
Bestalde, Txanka-hondartza bidean, ezingo da autopistara sartu goizeko momentu batzuetan. Arratsaldean 16:00etatik 17:00etara egongo da itxita. Herriko plaza inguruari dagokionez, lasterketa bukatu arte, plaza ez dute oinezkoentzako bihurtuko. Beraz, kaia izango da herriko irteera, egun normaletan bezala, 17:30ak arte. Horrez gain, Orioko Udalak Goiko Kaleko semaforoa desaktibatuko du, Zarautzerako bidea bertatik egin ahal izateko. 17:30ean berriro jarriko dute martxan semaforoa.
Hala, zenbait gomendio jakinarazi ditu Orioko Udaltzaingoak. Goiz horretan autoan mugitu beharko dutenei, herritik 11:30ak baino lehenago ateratzea gomendatu die, Zarautzerako bidea hartuta, gero edozein norabide hartzeko aukera izan dezaten. Arratsaldean autoan mugitu beharko dutenei, berriz, gogorarazi die Zarautzerako bidea irekita egongo dela 13:00etatik aurrera, eta bide hori hartu beharko dela, gero handik edozein norabide hartu ahal izateko.