Ekainean hasi ziren denboraldi honetako traineru ligak, eta sasoiaren erdialdean murgildu gara dagoeneko. Asteburuaren atarian, hurrengo estropadei begira daude Orioko arraunlariak. Oraingoan ere larunbatean zein igandean izango dira Euskotren eta Eusko Label ligetako jardunaldiak. KAE-2 ligakoek, aldiz, igandean jokatuko dute.
Hala, larunbatean Santurtzin (Bizkaia) dute hitzordua Euskotren eta Eusko Label ligetako ontziek. Santurtziko XL. Ikurriña izango dute jokoan gizonezkoek, eta VIII. Euskotren Bandera emakumezkoek. Igandean, baina, Getxon (Bizkaia) ureratuko dira arraunlariak. Eusko Labeleko taldeek bertan neurtuko dituzte indarrak Getxoko Estropaden XLI. Ikurriña eskuratzeko, eta Euskotrenekoek, Getxoko XI. Ikurriña irabaztea izango dute jomuga.
Bestalde, KAE-2 ligako jardunaldia ere izango da igandea. Orioko gizonezkoen bigarren taldekoek ere Getxon jokatuko dute estropada, XVI. Algortako Portuzaharra Ikurriña lortzea ipar.
Une honetan, aurreneko postuan daude Orioko hiru taldeak; hala, nagusi dira Euskotren, Eusko Label zein KAE-2 ligetan. Momentuz 31 puntu eskuratu ditu emakumezkoen ontziak; 110 gizonezkoen lehen taldeak; eta 71 gizonezkoen bigarren taldeak.