Irailaren 27tik 28ra 10. Gazte Festak ospatuko dituzte herriko gazteek, eta jaian parte hartzera animatu dituzte oriotarrak. Ohiturei jarraituz, Piraten danborrada egingo dute aurten ere, hilaren 27an, ostiralarekin.
Bestalde, paella lehiaketa ere antolatu dute larunbat eguerdi parterako. Antolatzaileek zehaztu dute, paella lehiaketarako tiketak ostiral honetan, Herriko Plazan egingo den Tonbolan soilik egongo direla salgai. 12€- ko prezioaren barruan bazkarirako osagaiak (arroza, tipula, baratxuria, olioa, gatza eta ogia) banatuko dira. Edateko, sagardoa txotxetik, ardoa eta ura eskainiko dituzte, baina paella prestatzeko sua norberak eraman beharko du.
Boluntario lana
Azken bi urteetan egun bateko jaia soilik izan da, hein handi batean antolaketarako boluntario faltak eraginda. Horrela, aurten Gazte Festak ez egiteko erabakia hartu zen, azkenean, ordea, gazte talde bat elkartu eta bilerak antolatzen hasi ziren. Gazte Festetako batzordea gustura dago aurten lortutakoarekin: "Boluntario ugari bildu da aurten, lanerako gogo askorekin gainera". Festen jatorriaz gogoratu dira batzordekideak aurten: "Gazte Festak gaztetxea okupatzeko gazte mugimendu gisa sortu ziren hasiera batean, eta herriko belaunaldi desberdinak biltzeko izan zuten arrakasta ikusita, urtero antolatu izan dira festak". Urte luzez, ordea, antolaketa lan guztia gutxi batzuen esku geratu ohi da. Aurten, jendearen lanerako gogoa ikusita egitaraua hiru egunetara luzatu da.
Festen lan ildoa
Azken astetan hainbat bilera egin dute gaztetxean, eta festa ereduaren inguruan eztabaidatu eta hausnartu dute. Nolako festak nahi ditugun zehaztu dugu, eta hainbat lan lerro jorratzeko konpromisoa hartu dugu, azaldu dute. Adostu dituzten konpromisoak dira: Gazte Festetan euskararen presentzia bermatzea, hondakinak gaika biltzea, festen barruan ahalik eta kontsumo arduratsuena izatea bertako produktuak eta ekologikoak erabiliz, ikuspegi feminista duten jaiak izatea eta protokolo bat zehaztea.
EGITARAUA
Irailaren 20an, ostiralarekin
19:00-21:00 Tonbola Herriko Plazan (Bazkarirako tiketak bertan bakarrik salduko dira).
Irailaren 27an, ostiralarekin
21:30 Danborrada Etxeluzetik
23:00 Rukula taldearen kontzertua moilan.
Irailaren 28an, larunbatarekin
12:00 Paella lehiaketaren hasiera eta kamiseta banaketa.
14:00 Paella beganoak aurkeztu eta presoen aldeko argazkia
Jarraian... Hemenbaen Baturaka herrian zehar. Tartean, jolasak.
Goizalden, diana.
Irailaren 29an, igandearekin
18:00 Argazki emanaldia. (Bidali argazkiak 650 31 78 95 zenbakira asteburuan zehar)